ma ulah sa urang

“Tumatan padi turun ka hati!”
Maheng suara Hj. Tawaf manyanyi, tapi kada nyaring bangat, cuma babiya tadangar di padu rumahnya haja. Inya batunga mangadah ka hatap rumahnya nang kacilangan balubang, miris pabila hujan, kada batatiwir, tampayan bintang nang karidipan dilangit. Iti, anak sidin nang batalimpuh di higa, takurihing surangan, mandangar akan inya manyanyi sumbang. Hj. Tawaf mangilar, Inya faham banar parangai anak babininya ngintu. Angah Jurmiyah, bininya nang bajuntai di waton batatai awan Iti gin umpat tatawa gimit, kada hangkoi ilah Hj. Tawaf tatawa. Amun badiri di barumahan barangkali kawa mandangar tawa Angah Jurmiyah. Mun di anjung surong rumah tu haja gin kada mati kadangaran bangat. Pasal tawa Angah Jurmiyah diarit-arit. Bahunya banar ai nang galidikan.  Rajin di malam-malam nang sabalumnya, mata Angah Jurmiyah lakas banar mangantuk. Satumat manguap. Tuhok Angah Jurmiyah manangop muntungnya ada kalihatan tabulahang ilah garuha. Tagal malam tu, matanya langsung kada kalat. Miski gin sudah Pukul 1.30 pagi, matanya magun ai sigar. Iti awan Hj. Tawaf gin kaya itu jua. Kedada lalu barasa mangantuk, bakirip gin kada. Hj. Tawaf, urangnya kaluloh. Pandalan urang kampong. Ka tangah bisa, ka higa gin kawa. Amun Hj. Jupri kedada, Hj. Tawaf pang jadi imam di narasah. Mambawa tahlil du’a salamat urang aruh. Baikan banar awan urang. Baik awan dangsanak, marina atau kakawalannya. Laginnnya ai mun awan anak bininya. Bisa pulang balalucu, kada karing gusi pang sipa haja nang bapandir awan sidin.Amun di rumah, sidin batapihan haja. Nyaman jar sidin air cond masuk. Baju parak cap pagoda kaya itu jua, sabati awan sidin. Sambil mangacip bunga cangkih, sidin marupoi kamayan, dikambuh awan tambakau Langkap. Sabuting-sabuting sidin malulon ruko daun. Batis sidin nang kator katuhukan bagawi siang tadi, ditinjak-tinjak akan ka hadap. Puhon lunok nang mulai limer, sidin picek, sidin dikasai awan minyak jerangau merah. Tarasa nyaman bila angin hangatnya marasap ka dalam kalibir.
“Iti, cuba am tangguhi, abah nyanyi lagu panya tadi? Hj. Tawaf manyurong pander sambil jariginya mangatik pancis. Ruko daun sidin puwai, dikantim kuat-kuat di sala bibirnya sambil mangaya akan ada ruko daun tu luloi dari muntungnya. Sidin hiyut puas-puas. Bila dilapas asap ruko bakukus kaluar tumat hidung wan muntung sidin.

“Abah kaganangan kisah bahari kah? Rahat bakahandak awan uma leh? Atau saja rami-rami manggaradau ?”. Iti manjawab sualan abahnya dangan batakun balik. Tangan Iti lantih bajajawih. Tumatan imbah solat Isya’ tadi Iti mangganii umanya. Mungkhana nang Iti puruk wayah sambahyang tadi gin balum dipacul. 

“Uma…! Abah nia tagak urang rahat bacintan-cintun, Ma ai.., manyanyi lagu urang karindangan”. Bagamat Iti manyudi Hj. Tawaf.

“Umai…! Jauhnya pang ikam nia layaunya, Ti… Kada suwah kalain hati abah nia. Biar bahari-hari bakalahi, disariki umamu, kada langsung maumat kasih abah, ka uma mu jua ai magun tapuntalnya”. Sambil tatawa Hj. Tawaf manjawab.

“Amun kaya itu, ngintu lagu cinta abah wan uma bahari pang kaluku”. Mangalua Iti manyambungi.

Bujur ai Hj. Tawaf Kandangan tutok. Angah Jurmiyah, urang Halabiu Parit Abas. Iti sikit gin kada manurun kawitannya. Iti sabati awan bahasa Kalua. Hj. Tawaf manajak rumah di Sungai Dungun tu bahari wayah Iti baumur dua tahun. Jadi Iti saumuran ganal di padang urang Kalua.

“Nah…! Ikam saja anak nang pintar, Ti ai….!” Puji Hj. Tawaf sambil mahiyut ruko daunnya. Jari kalingkingnya tumat tadi ilah garumit mangurik-ngurik lubang talinganya nang gatal. Mungkin kana tapal tungau masa mangarat padi ari dahulunya. Tangan kiwanya ditapak-tapakakan ka dadanya nang manjaing manahan batuk. Bakukos ilah palakon carita kuboi High Chaparal, Hj. Tawaf malapas asap rukonya.

“Nang sabujurnya, pugaan abah taitihi umamu wayah umpat badarau mananam padi di bandang aruah datumu. Imbah itu lalu ai umamu tu angau! Kada magan kada batamu abah. Sahari haja gin mun kada taitih muha abah…..lalu ai umamu tu kada bapangrasa. Kada lalu makan, kada lalu nginum, kada janak guring. Asaan ku bahira gin suwah kada babasuh! Bahari napa kada sama wayah ini. Kedada batalepon, kada kawa ba-SMS. Jadi umamu tu, di ambin pang diam mahadangi amun ada Abah lalu. Kaganangan kisah tu, mambari tatawa banar. Abah mun kaganangan lalu ai manyanyi lagu Ebiet G. Ade, Ti ai…”. Hj. Tawaf saja handak manyucok Angah Jurmiyah.

Angah Jurmiyah nang tadinya batunduk, badadas batunga, gulunya tarasa sakit, ilah kana salaho. Inya mahawasi muha Hj. Tawaf.

“Umani liiii, nyamannyaaa mayambatiii uraaaang. Awak saurang tuuu kalukuuu….?” Ujar Angah Jurmiyah mangalabiyu, maindah akan apa nang disambat oleh lakinya. Marah Angah Jurmiyah bila dipadahakan inya nang dahulu manghandaki Hj. Tawaf masa anum bahari.

“Ayu ja ikam ingatakan, siapa yo yang dahulu mangurat? Aku ka ikam? Lha… siapa pang lagi, mun kada ikam….bujur kada….?” Hj. Tawaf maandak tangannya ka dahi, maingatakan kisah bahari. Iti kada umpat bailun. Inya manawa akan kadua kawitannya haja. Abah wan umanya mulai balalawanan, batundungan. Kaduanya kada hakun baalah. Iti kada hingkat lagi maharit, pacah parutnya tatawa kada sing rantian.

 “Jangan caya cakap abahmu tu, inya layau banar ai, Ti ai!” Angah Jurmiyah maindahakan, inya mulai sarik kana huluti oleh Hj. Tawaf.

“Abahmu tu ya am kaya itu! Bisa banar bakulim. Amun bacarita kisah bahari. Kisah inya awan uma, kisahnya selalu dibalik! Jadi kisah nang sabujurnya tabalik Ti ai!” Angah Jurmiyah manguatkan hujah.
“Wah, siapa nang bujur? Abah ka uma?” Iti…mulai kaliru.
“Tantulah abah, Ti ai!” Hj. Tawaf manyambungi.
“Carita ku nang bujur, Ti ai!” Angah Jurmiyah mamagat. Kali ni, baaci Angah Jurmiyah mayakinkan anaknya.

“Amun kawo handak tahu, Ti ai, wayah kami bakahandak bahari, abah mu tu bilangnya kada tawas urang jadinya. Tuhuk banar inya malitiki uma, kada jua uma mahirani. Taga kacangkalan inya, kaakhirannya uma balasi ai jua. Imbah itu, Ti ai, abahmu tu! Jadi ikung uma! Ke mana haja uma tulak, abahmu mairing akan! Amun tatinggal, satumat jua udah am inya sampai! Suwah bahari abahmu babiskar lalu ditungkaran rumah datumu. Matanya mangulih tibak rumah uma. Lambu sing ganalan makan rumput dipinggir jalan diranjahnya. Hapus muha mancabau ka parit! Urang bahari kupiah kada tinggal. Kapul-kapul kupiah abahmu timbul. Imbah ari tu parak saminggu abah mu kada purun malalui rumah uma”
Hj. Tawaf tapingkal. Iti gin tapingkal mandangar Angah Jurmiyah bakisah.
“Iya kaya itu pang umamu, Ti ai! Kada mau mangakui? Nang sabujurnya, umamu tu  manggilai abah nia! Mun kada kaya apa inya tahu, maitungi harinya, sampai saminggu abah kada malalui tungkarannya” Hj. Tawaf tatap kada mau kalah.

“Kawo magun Ti lah kaliru, handak pacaya awan abahmu tu. Inya tu sabujurnya kada purun mangakui sajarah cinta kami!” Kali ni sampai kancang gulu Angah Jurmiyah. Habis timbulan uratnya. Parut Iti samakin karas, tuhuk inya manahani tatawa.

“Kaina hulu. Uma ai…! Abah….!” Sambil manahani tatawa, Iti handak mahalat, maranai akan abah wan umanya.

“Makin tangah malam, makin parak subuh, makin rami, makin rancak bapandir?”Hj. Tawaf manambahi. “Saja kaya ini, Ti… leh, nang kaya urang bamain wayang pang! Makin handak habis makin rami! Makin suspen!” ujar Hj. Tawaf sambil mambujurakan sila.
“Iya am tu, Ti ai! Pasalnya abahmu tu nang bakalaku, macam-macam disambatinya, uma ni!” Angah Jurmiah maniwas.

Sambil manahani tatawa Iti batakun. “Sabujurnya, masa anak taruna bahari, abah bagawi panya? Maambil upah manjurak nyiur juakah?”Mandarau……. Taumbai Hj. Tawaf saparanakan tatawa.
“Maambil upah gin iya, manjurak nyiur gin iya, Ti ai!”Angah Jurmiyah mamadahakan. “Amun ikam handak tahu, Ti ai. Mun kedada nyiur nang tuha, nyiur nang kalatupan tu gin dikait abahmu! Nang sadang hinti gin digubainya!”
Mandarau pulang tatawaan anak baranak tu.
“Cuba ikam itihi, Ti ! Bisanya umamu tu maulah hual!” Hj. Tawaf barasa inya kawa mambuktikan hujahnya.
“Mara am? Saja disanghaja akanku? Tumatan tadi kita layau. Napa hanyar ini abahnya barasa alah?” ujar Angah Jurmiyah. Lalu inya bangkit dari tikar purun rumbis nang didudukinya tumat tadi. Inya manuju ka atang. Tadangar banyu nang ditanggar manggurak, tudung cirat bailon, taungkap-ungkap.

“Abahnya jua tadi nang mamulai basurah kaya itu?” Angah Jurmiyah saparo maraju.
“Nah, aku jua nang kapalitannya? Dimapatuai?” Hj. Tawaf baalah.
“Tadi? Tadi abahnya nang maulah carita ka Iti?
“Carita napa pulang?”
“Abahnya maulah carita nang masa bahari Uji Rashid gin suwah manulis surat kanu  sampeyan, bapadah “I love you”, lalu ujar sampeyan cinta Uji Rashid tutih kada sampeyan jatu?”
“Uma ai, Si Umanya Iti, si bungas pangarang jantung ku!! Amun an di aku menulak cintanya Uji Rashid tutih….pasal aku sayang banar lawan di ikam?”
“Nah, cuba diitihi , Ti ai…Abahmu tu! Carita nang kedada handak diada-adakannya. Kaya apa Uji Rashid handak manulis surat kanu inya, mandangar ngaran Hj. Tawaf haja gin kada suwah, ini kan pulang handak manulis surat..? Baguncang dunia Ti ai….!”
Hooo….hooo…hooo…..…! Angah Jurmiyah manawakan Hj. Tawaf, langsung bagilup ka padu.

Sudah jadi kapatuhan di rumah tu, saban tangah malam nginum banyu hangat. Sambil bagawi, nginum banyu hangat. Kakananya tu Iti nang mambancuh kupi, takananya tu Angah Jurmiyah, sasakali bisa ai jua Hj. Tawaf. Malam tu Angah Jurmiyah nang maulah banyu hangat. Inya pand tadi  nang pandahulunya mandangar banyu manggurak. Iti awan abahnya kada bagarak,  magun ai bahunjur mambarsihi wan mangarut bayam, kangkung, jalukap, pucuk kato, kusisap, tarok kastila, kacang panjang, wan nang lainnya. Baisukan lalapan tutih pacang di antar ka maraket Batu 5.

Angah Jurmiyah manghiyau Batu 5 tu “Wadah Pabarasan”. Di situ pang sudah baumuran inya saparanakan bacari sapangikeh pagi sapangikeh patang. Salain dari maambil upah, duit gasan balanjaan dapur, ungkos sakulah Iti datangnya dari hasil bajualan lalap di maraket tu pang. Sagala macam lalap ditata siap-siap  dalam bakul inanan. Jadi baisukan tuntung haja sambahyang subuh, Angah Jurmiyah mancungkung pang di motor Hj. Tawaf ka Batu 5. Di situ, Angah Jurmiyah ditinggalkan bajualan di maraket lawas, di higa kadai kopi Cina Toh Kea. Kaya itu saban hari kacuali hari Salasa wan Arba. Hari Salasa Angah Jurmiyah ka Pakan Salasa di Simpang 3. Arba pulang di Pakan Arba.

Imbah maantar Angah Jurmiyah, Hj. Tawaf langsung ka kadai kopi. Hj. Tawaf tumat bujang lagi, kawin awan Angah Jurmiyah, baanak Iti, datang ka wayah ini, inya kada suwah makan pagi di rumah. Kada suwah lingo inya, di Batu 5 tu pang mangupi. Kakananya inya makan nasi lamak di Tarumbu Mat Nawi.  Mun kapingin ruti canai inya ka kadai Kaling Muhamad atau kadai Raji Masdar. Di situ jar rotinya nyaman, Si Aca ngaran tukang tampiknya. Di kadai Timang Banjar, mee bandungnya kedada lawanannya di Krian. Kaya itu ai jua laksa wan ais kacang ulahan Kaling Nyen. Satakat tiga pinggan Hj. Tawaf kada manampik. Nyaman liur Hj. Tawaf, makan lalu, hati sanang, awak sihat jadi sual makan kada suwah batangatan. Tagal Hj. Tawaf kada bisa malapok. Tuntung makan, inya tarus bulik, manyahan kakuar panjang tulak mangait nyiur urang. Anak kamanakannya, Si Apak pang nang tiap hari mairingkan inya jadi tukang kupek nyiur wan basahanan. Hj. Tawaf kada kawa lagi maulah gawian tu surangan. Inya kada gancang ilah masa anum bahari. Tu pang, nasib baik ada Apak jadi pandalan.

Hj. Tawaf bagawi satayuhnya haja. Amun kada talah pagi, disambung patang. Pukul 11.00 Hj. Tawaf sudah ai barantat. Apak pang nang tinggal mamilihi, mangumpulkan, mangupek wan mamangkung nyiur. Imbah mandi inya tarus ka Batu 5 maambili Angah Jurmiyah. Palaluan tu sawat jua inya mangupi makan bihun sop di kadai Halim atau nginum lin chee kang di kadai Hj. Akai.

Kada lawas Angah Jurmiyah bingsul tumat padu mamabawa ciper awan banyu kupi nang bakukos.
“Ooo mani, salang bangalih-ngalih pulang, umanya ni? Ada urang jauh datang kah? Hj. Tawaf, mamarli.
“Ayuha, amun wani, tadi sabalum ulun maulah kopi abahnya baucap kaya itu……?!” Angah Jurmiyah malawani sambil manyurung kupi ka Hj. Tawaf.
“Amun baucap tadi kaya itu, yaa am…?”
“Karing pang rangkongan, Abah?” Iti manyambungi.
”Bapandir, bapandir jua, gawian jangan taranti”.
“Tu….. nang ngintu?” Angah Jurmiyah manunjuk ka bakul inanan.
“Napanya?” Hj. Tawaf manjawab sambil mahirup banyu kupi.
“Tu…! Nang dalam bakul parak balukuk abahnya tuh? Ca dibuka tudungnya!” Angah Jurmiyah mamarintah.
Hj. Tawaf kada bailun, inya lakas bapaling manjuhut bakul inanan.

“Umai ai, mbari sariknya! Tarung sakalinya, Ti ai!!”
Mangulakak Hj. Tawaf tatawa awan awak-awaknya sakali galidikan. Tawing pahalat tampat sidin basandar baguyangan.

“Kada madayi pang, urang rahat nginum kopi gin disuruh malalap tarung?!” Hj. Tawaf mawada.

“Mun kada dilalap, tangah hari esok ya am lambat aku bamasak”. Angah Jurmiyah kada hakun kalang kabut. Amun sunyaan sudah talah, bulik tumat badagang inya tinggal mananggar pariuk banar ai lagi. Inya faham banar, mun tangah hari Hj. Tawaf makannya handak lakas. Lakas badzuhor, lakas pulang inya tulak bagawi.
***
Turun dari kapal tarabang Iti tarus ka Balai Katibaan. Ada banyak teksi baatur di situ. Urang barantuk mahadang teksi. Iti kada umpat baatur. Inya badiri di higa tampat teksi barantat.

“Umpat ka sini haja ikam, Ding ai” Urang dari dalam teksi manawari Iti.

“Amun handak mahadang teksi nang puang, lawas lagi hanyar ikam dapat”. Jar urang tu pulang. Iti kada manyinggaiyi, tagal tarus bajalan ampah ka hadap lalu babuat ka dalam teksi. Memang Iti handak lakas. Inya kada hakun diam di padang urang banyak. Kapalanya asa basamut. Dalam teksi tarasa nyaman, air condnya cukup dingin, Iti basandar sampai taparunok jauh-jauh di tampat duduk nang manganyat. Maklum teksi tu teksi hanyar, baunya gin magun ai bau kadai. Kada sawat berapa minit sudah ai Iti takijim. Iti kaganangan macam-macam. Umanya, abahnya, rumahnya wan lain-lain. Ada kalanya mata Iti bebanyuan, sadih bapisah awan uma abahnya. Ada kalanya, Iti takuriheng, inya kaganangan kisah lucu inya awan kawitannya.

“Bop…bop….!!!! Teksi tahantak, talanggar lupak, tuhuk daribarnya mailak, maliyung-liyung jalan nang balibak. Siti tahanjat. Inya palingau-palingau ilah hayam tumbar kana gampak. Di higanya urang tuha saparo umur nang tumatan dari lapangan tarbang tadi maitihi kalakuan Iti takurihing. Iti batunduk. Muntungnya dikulibikan, hujung ilatnya takaluar di sala bibirnya. Takutan ada kalihatan oleh urang, lakas Iti mamangup muntungnya awan bungkus. Inya supan banar kaluku diurahkan oleh urang tuha tu.  Maklum dari tadi Iti sumat takuriheng, satumat basasigan manangis. Iti takutan kaluku dipadahkan urang kada cukupan.
“Napang, Ding?” Urang tuha nang tadi diam haja manyurung pander.
Iti mangulih ampah ka urang tuha nang marawa inya. Urang tuha tu mungkin tatuha atau pantaran wan Hj. Tawaf. Sidin takuriheng. Iti kada tahu di mana handak maandak muha. Iti paragahan mancari sasuatu dalam beg tangannya.

“Ah, kada, kedada apa, Angahnya ai.”
“Kaganangan buah hati, kaluku?”
“Kada, ulun ni mahinam, Ngah ai.”
“Madayi pang urang mahinam tatawa?”
“Tatawa basasala awan tangis, Angahnya ai?”
“Amun sumat manangis, satumat tatawa tu tantu arai kaluku?”
“Tagal mun urang rahat talalu sadih, katuhukan manangis, bisa ai pulang tabulik jadi tatawa, Angahnya ai?”
“Ooo…, dintulah, mungkin aku ni talalu kabanyakan pangalaman sampai lali jadinya?”
“Inggih, Angahnya ai.”
“Tapi ikam tatawa tadi tu, kada am pasal sadih bangat, kaluku?”
“Kaya apa andika kawa manangguhi?”
“Laaa, angah kada manangguhi, angah ni batakun banar ai…!”
“Oo…”
Urang tuha tu batakun ngaran Iti. Langsung bacuur.
“Ngaran ulun Iti, asal dari Batu 5, Parit Buntar, Perak.” Langkap Iti mamadahakan.
“Ulun Hj. Adol, diang ai. Asal Kampung Banjar Sungai Kayu, Sandakan. Sapatutnya aku manyaru ikam anak. Tagal kawa ai kalo amun aku manghiyau ikam nia Ading?”

Dalam hati Iti nyambat, urang tuha ngini handak manggatal ka pulang. Iti bapiragah kada mandangar. Matanya mangilar ampah ka lori balak wan kurita lain nang manggalur basalisih awan teksi nang dinaikinya.

“Anakku nang pambusunya pantar ilah ikam ni ai jua, Ti ai. Babini!” Hj. Adol manaruskan pander.
“Oo…, kaya itu kah? Tantu paruna urangnya?” Iti manangguhi.
“Hiih ai… mun babini tu sunyaannya ai paruna, bungas, langkar. Mun babini awaknya sindo, ilah Malek Noor ya am hairan pulang urang kaina?” Hj. Adol mulai balucu. Iti tatawa, lalu manyambungi.

“Ulun ni saikungannya jua anak abah. Anak tunggal, Tangahnya ai.” Iti bapadah.
“Waah, ujik  banar ikam ni mun kaya itu?”
“Inggih. Ulun nia anak manja! Mandi gin jarang!”
“Mun kaya itu tantu dikambuhi banyu dingin, sako?”
“Panya maknanya tu….Tangahnya?” Dahi Iti bakarudut.
“Jarang tu, mun di sini maknanya banyu bajarang. Amun mandi pakai banyu bajarang, …?”

“Hoo….hooo…..”. Ngalakak Iti tatawa baluman sawat habis Tangah Adol bapandir.
“Wah, Tangah ni urangnya nang ilah abahku jua!” Ganal hinak Iti katuhukan manahani tatawa. Tangah Adol minek.

“Angahnya ni ilah Abah ikamkah?” Angah Adol batakun.
“Maksud ulun, Angah ni ilah Abah ulun, katuju bakaluloh, mahuhuluti urang!” Iti manyambung.
“Oo…, madayi pang. Anaknya gin kaluloh jua….?” Dua balah tangan Hj. Adol manunjuk ka Iti.
“Mun ulun ni kaluloh, anak Tangahnya gin tantu ai jua kaya aku.” Iti kada hakun kalah.
“Kada jua kaitu, Ti ai. Inya manoh urangnya. Manurun biniku kaluku”. Hj. Adol maindahakan.

“ Eh, bapandir, bapandir jua, upat batakun. Abah ikam napanya gawiannya?” Hj. Adol maubah tajuk.
Susaini Iti  tabungkam. Tumatan tadi Iti cuba mailak ada ditakoni sual gawian kawitannya. Inya asa supan handak mamadah akan gawian abah umanya. Sakalinya imbaham Hj. Adol manakunkan sualan nang ngintu.
“Emh…….., bagawi saurang, Tangahnya ai,” Jawab Iti ilah urang kulir.
“Wah, bagus! Bagus nang kaya itu! Napa nang diusahakan sidin?” Hj. Adol handak tahu.
Iti kada purun manyambat. Inya diam, matanya kidip-kidip, dua talapak tangannya digisang-gisang disapu ka muha, macam urang handak mahilangkan mangantuk. Sambil tu kutungnya nang takusasai dibujur-bujurkannya.

“Minta maaf amun Angah tadi batakun sualan nang paribadi. Tagal, Ti ai, nang sabujurnya, gawian napa haja gin, asal inya halal, kada mangalihi ka urang lain, gawian tu gawian nang tahormat. Angah ni bahari jadi DO. Tagal biar ganal pangkat DO tu, amun kada bagus, rasuah atau makan suap ujar urang kita. Mulia lagi urang nang maminta sadakah di bawah jambatan tu, Ti ai” Ujar Hj. Adol tagak maalim.
“Abah ulun bagawi kampong, maambil upah dibandang, manjurak nyiur. Uma ulun pulang badagang lalap di pakan hari, Tangahnya ai”. Iti kedada pilihan lain lagi. Inya tapaksa mamabuka muntung miski gin tadi mulaannya inya handak barahsia.

“Ngintu kah nang disupan akan ikam?” Hj. Adol batakun lagi.
Iti baunggut. “Ulun supan, tangahnya ai.”
Tangah Adol tatawa, “Urang tu jadi supan, amun kawitan jadi maling atau maulah gawian nang kada karuan, Ti ai !”
“Tagal ulun memang supan, Tangahnya ai. Sadih gin ada.Sadih bangat?”
“Ulun kada kawa lagi mangganii abah wan uma. Kasian banar Tangah ai, Abah wan uma ulun.” Muha Iti makin marangut. Inya kaganangan abah umanya di rumah.
“Sabujurnya kanapa ikam ni, Ti….?” Haji Adol mangurik.
“Sabujurnya, Tangahnya ai? Ulun ni ka Sabah, kadanya sahari atau dua hari, bisa ai sako manalo atau lima tahun!” Banyu mata Iti barubuian. Lakas dilapnya awan bungkus nang tumat dalam kapal tarabang tadi pisit ditangannya.
“Mun kada jadi rahasia, Iti ni ka Sabah ma-apa…?” Hj. Adol maitihi.
“Ulun hanyar pas matrikulasi, Tangahnya ai,” Ilon Iti minsang saikit, katuhukan basasigan.
“Waah…?” Tangah Adol tahanjat.
“Sabujurnya ulun kada handak ka sini. Ulun mamilih universiti nang lain di samananjung. Tagal bila kaluar kaputusannya imbaham dapat tawaran ka sia’. Aabah pulang bilang karas banar manyuruh jua ulun tulak!” Siti makin salesa bapandir.
“Laa… ai, saja bujur ai kaputusan abah ikam tu. Amun anak Angah gin, Angah suruh tulak. Pasalnya kadanya nyaman handak masuk IPTA wahini, kuat saingannya. Ikam ni kiranya banasib baik banar?” Hj. Adol handak mamanangkan kaputusan abah Iti.
“Taga ulun kada yakin nang kawitan ulun hingkat maungkosi ulun sampai talah! Amun taranti pang di tangah jalan, mambuang-buang duit banar ai tu ai. Duit pulang saujar ngalih cariannya, Tangahnya ai?”Hati Iti magun ai angkal-angkal, balum nahap handak balajar. Tangah Adol takuriheng sambil mailing-ileng akan kapala.

“Sebaiknya,” ikam jangan kalah sabalum mancuba! Turut akan haja kahandak kawitan. Jadi anak nang paasian. Ingat, rajaki di tangan Tuhan, Ti ai?” Hj. Adol mamadahi.
“Memang bujur ujar Tangahnya tu. Ni pang jadi ulun tulak jua, meski ulun dahulunya kada suwah talintas handak ka Sabah ni. Tagal ulun…” Suara Iti taranti di situ…..

 “Sebaiknya ikam dikarapi badu’a supaya rajaki kawitan ikam murah, pangajian ikam lancar. Samangat abah ikam tu harat banar, kada madayi pang samangat anaknya ilah hayam pincat? Ikam Ti ai….. jangan barasa basalah pasal kada kawa mangganii kawitan lagi. Tumatan Sabah nia gin ikam kawa haja mangganii sidin.” Hj. Adol manarus akan pander.
Iti mahawasi mata Hj. Adol. Dikantimnya bibirnya dua tiga kali. Hanyar inya basuara pulang.

 “Kaya apa caranya, Ngah?”
“Ikam, cangkal-cangkal mangaji!” Tangah Adol mamadahi.
Iti pusang.
“Laa, ni ia bujur, Ti ai? Saing balajar tu sudah sama ai awan manulungi kawitan! Ada lagi mun ikam handak manulungi? Dapat akan prestasi nang bagus! Ikam kaina mungkin dapat bantuan! Di kampus tu, Ti ai, bantuan ada banyak jenisnya! Kada dapat nang sabuting, banyak lagi nang lain! Banyak pang, pokoknya! Ikam haja, dicangkali mangaji?”
Iti tamakan nasihat Hj. Adol. Sabuting-sabuting masuk ka hatinya. Iti maunggut-unggut akan kapalanya, mandam mamikir akan pepadahan Hj. Adol. Samangat Iti mulai bakuat.  Inya barsyukur tanaiki teksi ni tadi, sateksi awan Hj. Adol nang baik banar urangnya.

Iti magun ai kaganangan parpisahan di Lapangan Tarbang Bayan Lepas tadi. Asa kadangaran ai lagi suara kawitannya di talinga Iti.
“Uma, Iti berangkat hulu lah. Du’a akan, Ma ai!” Iti mancium tangan wan pipi umanya.
“Hiih, Nak ai. Salamat jalan. Jaga diri baik-baik!”
“Insyaallah, Ma ai….Abah…., Iti……” Kada ditarusakannya suara hatinya.
“Daham manangis Ti ai! Biar ikam anak babini, ikam kada buleh lagi maambalar wan bapiruhut di pohon katiak umamu! Mara ai tulak! Di sana kaina ikam cangkali balajar, Nak ai….?” Hj. Tawaf kada suwah manangis sumbangan tuha ni. Tagal pagi tu, alah sidin. Babanyuan mata, sampai takaluar hingus sidin manangis. Angah Jurmiyah tambahnya ai pulang. Sampai manggarung. Maklum handak malapaskan anak nang saikungannnya. Kada suwah bapisah saumuran. Hj. Tawaf ingat banar halam. Imbah UPSR, Iti dapat tawaran masuk ka Sekolah Tun Fatimah, Johor Bahru. Angah Jurmiyah kada mambariakan Iti tulak. Sampai ka rumah Hj. Tawaf, Cikgu Halid, Guru Basar sakulah Jalan Baharu datang mamaujuk Angah Jurmiyah. Taga Angah Jurmiyah kada asap malapaskan Iti. Mun Angah Jurmiyah kaya itu pang pahatian sidin. Hj. Tawaf gin kada hingkatmaulah apa-apa.

“Insyaallah, Bah ai.” Iti manjanjii abahnya sambil manahan sasigannya nang samakin kuat.
“Daham diingat-ingatakan kami di kampong ni. Insyaallah abah uma wagas haja! Nang panting, bulat akan hati ikam balajar! Tahu kah?!” Suara Hj. Tawaf tasakat-sakat awan tangis.
“Insyaallah, Bah!” makin kuat Iti maikup Abahnya, sama kuatnya awan sasigannya. Iti bajalan ampah ka kaunter check in. Abah wan umanya manireng akan tumatan jauh. Iti maangkat tangan mangawai abah umanya. Abah umanya mambalasi, mangawai tangan jua.
“Iti barangkat!!! Doakan Iti!!!” Sasigan Iti makin kuat. Urang nang baatur dihiganya sampai manguleh. Iti manjuhut bungkus nang memang ada dalam paket baju kurungnya. Inya malap banyu matanya.
“Talipon amun sudah sampai di Kota Kinabalu kaina!!!” Hj. Tawaf mamasani.
“Inggih!!!” Sahut Iti.

Iti kada kawa lagi manahan banyu matanya, meski gin dihadapan Hj. Adol inya baparagah biasa haja. Teksi mambilok masuk ka muhara kampus. Mandak satumat di wadah pamariksaan pangawal kasalamatan.  Usai dipariksa, teksi bagarak ampah ka Asrama Puteri, manurun akan Iti di lobi bangunan Pajabat Asrama. Wayah handak turun teksi, Hj. Adol mangaluar akan business card sidin.

“Ikam aku angkat jadi anakku Iti ai. Amun ikam ada cuti bailanglah ka rumah. Kaina dudi-dudi, angah wan angah bini ka mari malihati ikam. Amun kapalipitan atau ada masalah, daham supan bapadah, talipon angah. Maklum ikam ni kedada sasiapa di sia”. Ujar Hj. Adol sambil mancalok paket mangaluarkan kupek. Sidin manjuhut duit not RM100 dijulung kanu Iti.

“Ambil gasan manambahi duit balanja ikam”. Kaina mun sudah talapang Angah ka sia pulang mailangi ikam.
“Terima kasih, Tangahnya”. Himung banar Iti tatamu wan Hj. Adol nang baikan banar urangnya.
“Salamat bajuang!” Hj. Adol baucap sabalum lawang teksi dikatup.
“Insyaallah.” Iti mambalasi.
Iti mandam, mahawasi teksi nang bagarak mambawa Hj. Adol sampai jauh, jauh maninggalakan kawasan kampus.